• انتشار: ۳۰ عقرب ۱۴۰۰
  • ساعت: ۰۹:۳۳
  • سرویس: اجتماعی
  • کدخبر: 68529
پرینت

اخراج پناهجویان افغان از تاجیکستان؛ سازمان ملل: اخراج پناهجویان افغان نقض قوانین بین المللی ست

سازمان ملل از تمامی کشورها خواسته است از اخراج پناهجویان افغان در شرایط فعلی خودداری کنند. بنابر اعلام این سازمان اخراج پناهجویان افغان نقض قوانین بین المللی محسوب می شود.

کمیساری عالی پناهندگان سازمان ملل «UNHCR» ابراز نگرانی خود را از اخراج پناهجویان افغانستان توسط مقامات حکومت تاجیکستان اعلام کرد.

براساس معلومات این نهاد، در یازدهم نوامبر، ۱۱ مرد، زن و کودک افغان که در تاجیکستان پناهنده بودند، پیش از بررسی در مورد ادعای پناهندگی و حمایت، به افغانستان بازگردانده شدند.

کمیساری عالی پناهندگان سازمان ملل هم‌چنین نگران افزایش موانع برای شهروندان افغانستان در تاجیکستان است.

معلومات این نهاد نشان می‌دهد در پایان ماه جولای سال روان میلادی، مقام‌های محلی تاجیکستان صدور مجوز اقامت برای همه شهروندان افغانستان تازه وارد را به حالت تعلیق درآورده‌اند.

افزایش محدودیت‌ها و تعلیق بررسی پرونده‌های پناهندگی در تاجیکستان سبب شده تا شهر‌وندان افغانستان که به تازگی وارد تاجیکستان شدند، با خطر جریمه، بازداشت و اخراج احتمالی به افغانستان روبه‌رو شوند.

کمیساری عالی پناهند‌گان سازمان ملل از حکومت تاجیکستان خواسته است از اخراج اجباری پناه‌جویان افغانستان به این کشور خودداری کند و «فوراً مراحل اقامت قانونی و تعیین وضعیت پناهندگی» را از سر بگیرد.

به تازگی کمیساری عالی پناهنده‌گان سازمان ملل، «توصیه جهانی برای عدم اخراج اتباع افغانستان» را نشر کرد که در آن خواستار جلوگیری از اخراج اجباری همه اتباع افغانستان از کشورهای دیگر شده بود.

از دید این نهاد، اخراج اجباری شهروندان افغانستان در شرایط کنونی نقض جدی قوانین بین‌المللی است.

گفتنی است در جریان سال‌های گذشته، شمار زیادی از شهروندان افغانستان که قصد سفر به کشورهای غربی دارند، با مهاجرت به تاجیکستان، در دفترهای کمیساری عالی پناهنده‌گان سازمان ملل، پرونده مهاجرتی باز کرده‌اند.

دیدگاهتان را بنویسید

نشانی ایمیل شما منتشر نخواهد شد.