- خبرگزاری رها - https://rahapress.af -

عبدالله عبدالله به سویس رفت

در اعلامیه‌ای که امروز (پنج‌شنبه، ۶ سرطان) از سوی ریاست اجرایی کشور به نشر رسیده، آمده است این سفر آقای عبدالله به دعوت رسمی جین‌پول کرتن، رییس عمومی نهاد بین‌المللی کران مونتا صورت گرفته است.

سی‌امین اجلاس سالانه‌ی این نهاد با اشتراک رییسان جمهور، صدراعظم‌ها، وزیران، سیاست‌مداران، نمایندگان سازمان‌های بین‌المللی، سازمان‌های منطقوی، سازمان‌های غیردولتی و تاجران بیش از صد کشور جهان دیروز در شهر جینوا آغاز شده است. قرار است این اجلاس تا دو روز دیگر (۸ سرطان) ادامه یابد.

در این اجلاس نهاد بین‌المللی کران مونتا قرار است در مورد قضایای سیاسی، اقتصادی و منطقوی و طرح راه ابریشم میان اشتراک‌کنندگان بحث شود.

آقای عبدالله در حالی به کشور سویس سفر کرده است که محمداشرف غنی، رییس‌جمهوری کشور نیز صبح امروز به دعوت رسمی عمران خان، نخست‌وزیر پاکستان در رأس یک هیأت بلندرتبه‌ی دولتی عازم اسلام‌آباد، پایتخت پاکستان شد.