• انتشار: 22 دسامبر 2020
  • ساعت: 14:49
  • سرویس: سیاست
  • کدخبر: 52342
پرینت

عبدالله در تاجیکستان: حمایت دوشنبه از صلح افغانستان مهم است

عبدالله عبدالله رییس شورای عالی مصالحه‌ی ملی، نقش تاجیکستان را با درنظرداشت تجربۀ صلح در این کشور در تأمین صلح در افغانستان مهم خواند و خواهان همکاری این کشور در این زمینه گردید.

عبدالله عبدالله رییس شورای عالی مصالحۀ ملی، بعد از ظهر روز (دوشنبه، ۱ جدی ۱۳۹۹) با قاهر رسول‌زاده صدراعظم جمهوری تاجیکستان دیدار کرد.

صدراعظم جمهوری تاجیکستان تشریف آوری رییس شورای عالی مصالحه‌ی ملی را خیر مقدم گفت و از تلاش‌های صلح در افغانستان استقبال کرد.

آقای رسول‌زاده در ا‌دامه‌ صحبت‌های خود گفت افغانستان از دوستان و متحدان تاجیکستان می‌باشد و روابط میان دو کشور حسنه است.

صدراعظم تاجیکستان همچنان علاوه کرد کشورش از تلاش‌های صلح در افغانستان حمایت می‌کند و صلح و ثبات در افغانستان را صلح و ثبات در تاجیکستان و منطقه می‌داند.

رسول‌زاده ابراز امیدواری نمود تلاش‌های صلح به رهبری عبدالله عبدالله نتیجه بدهد و از همکاری کشورش برای تحقق صلح در افغانستان اطمینان داد.

عبدالله عبدالله رییس شورای عالی مصالحه‌ی ملی با تشکر و قدردانی از دعوت جمهوری تاجیکستان و همکاری‌های این کشور با مردم افغانستان و حمایت از تلاش‌های صلح، روابط میان دو کشور را دیرینه و تاریخی خواند و تصویر روشنی از مذاکرات صلح، حمایت منطقه‌ای و بین‌المللی از تلاش‌های صلح، سفرهای منطقه‌ای و وضعیت سیاسی در کشور ارایه کرد.

عبدالله عبدالله رییس شورای عالی مصالحه‌ی ملی، نقش تاجیکستان را با درنظرداشت تجربۀ صلح در این کشور در تأمین صلح در افغانستان مهم خواند و خواهان همکاری این کشور در این زمینه گردید.

دیدگاهتان را بنویسید

نشانی ایمیل شما منتشر نخواهد شد.