• انتشار: 6 جولای 2021
  • ساعت: 11:21
  • سرویس: سیاست
  • کدخبر: 60232
پرینت

تاجیکستان ۲۰ هزار نیرو در مرز افغانستان مستقر می کند

امام‌علی رحمان، رییس جمهور تاجیکستان، به وزیر دفاع این کشور دستور داده است ۲۰ هزار نیروی ذخیره را به مرز با افغانستان اعزام کند.

این تصمیم در پی تشدید ناامنی و جنگ در شمال کشور روی دست گرفته شده است.

در پی حملات طالبان در ولایت‌های بدخشان، کندز و بلخ، رسانه‌های تاجیکستانی گزارش دادند صدها نیروی امنیتی افغانستان به تاجیکستان عقب‌نشینی کرده‌اند.

امام‌علی رحمان روز دوشنبه، چهاردهم سرطان، نشست امنیت ملی این کشور را برگزار کرد. موضوع تأمین امنیت مناطق مرزی و اقدامات لازم برای تقویت حفاظت از مرزهای این کشور با افغانستان از محور مورد بحث این نشست بوده است.

رییس جمهور تاجیکستان دستور داده است برای پیش‌گیری از تخلفات مرزی از جمله جرایم فراملی، تروریسم، افراط‌گرایی و قاچاق مواد مخدر توجه ویژه شود.

امام‌علی رحمان دو روز پیش با محمداشرف غنی، رییس جمهور کشور نیز طی تماس تلفنی نسبت به وضعیت افغانستان ابراز نگرانی کرده بود.

محمداشرف غنی در مورد عبور شهروندان افغانستان به تاجیکستان، گفته بود به زودی دولت به وضعیت آن‌ها رسیدگی می‌کند.

امام‌علی رحمان با روسای جمهور سایر کشورهای آسیای میانه از جمله ولادیمیر پوتین، رییس جمهور روسیه، نیز تلفنی در این مورد گفت‌وگو کرده است.

خبرگزاری دولتی تاجیکستان – خاور گزارش داده است که پوتین و رحمان در مورد وضعیت نگران‌کننده کنونی در ولایت‌های شمالی و شمال‌شرقی افغانستان که با تاجیکستان و دیگر کشورهای آسیای میانه هم مرز است، به تفصیل گفت‌وگو کرده است.

دیدگاهتان را بنویسید

نشانی ایمیل شما منتشر نخواهد شد.