• انتشار: 18 سپتامبر 2020
  • ساعت: 20:28
  • سرویس: بین الملل
  • کدخبر: 48652
پرینت
در دیدار اتمر با مقامات تاجیکستان عنوان شد

تاجیکستان از صلح به رهبری افغان ها حمایت می کند

امام علی رحمان ضمن تأکید بر توسعهٔ روابط دو کشور در عرصه‌های اقتصادی، تجارتی و علمی-فرهنگی، همکاری با افغانستان را از اولویت‌های سیاست خارجی جمهوری تاجیکستان شمرد.

تاجیکستان اطمینان داد که از صلح به رهبری و مالکیت افغان‌ها حمایت می‌کند.

حنیف اتمر در سفر به دوشنبه با سران تاجیکستان دربارۀ روند صلح و همکاری‌های اقتصادی ملاقات کرد.

رئیس جمهور تاجیکستان آغاز مذاکرات صلح افغانستان را به وزیر خارجه و مردم افغانستان تبریک گفت.‌

آقای امام‌علی رحمان، ضمن ابراز امیدواری در مورد موفقیت مذاکرات صلح، از پشتیبانی دولت تاجیکستان از روند صلح و موقف اصولی جمهوری اسلامی افغانستان، به وزیر امور خارجهٔ کشور اطمینان داد.

سرپرست وزارت امور خارجه تمنیات نیک رییس‌جمهور غنی و ملت افغانستان را به حضور رییس‌جمهور امام‌علی رحمان پیشکش نمود و از حمایت‌های همیشگی دولت و مردم تاجیکستان ابراز قدردانی کرد. همچنان، آقای اتمر در مورد برنامه رئیس جمهوری اسلامی افغانستان که قرار است در آیندهٔ نزدیک به تاجیکستان سفر کند، به رئیس جمهور تاجیکستان معلومات داد.

رییس‌جمهور امام علی رحمان ضمن تأکید بر توسعهٔ روابط دو کشور در عرصه‌های اقتصادی، تجارتی و علمی-فرهنگی، همکاری با افغانستان را از اولویت‌های سیاست خارجی جمهوری تاجیکستان شمرد.

با اشاره به تقویت جایگاه افغانستان در منطقه، رییس‌جمهور رحمان تأیید کرد تعقیب پروژه‌های زیربنایی از جمله انتقال انرژی برق عامل جذب افغانستان در روند همکاری‌های منطقه‌یی می‌باشد. آقای رحمان همچنان گفت ملت تاجیکستان همیشه از موقف دولت جمهوری اسلامی افغانستان در تأمین امنیت و صلح پایدار پشتیبانی نموده و در راستای حل مشکلات سعی و تلاش کرده است.

در ادامه، دو جانب در پیوند به تطبیق پروژه‌های زیربنایی، توسعهٔ تجارت و ترانزیت، انتقال انرژی، مبارزه با تروریزم و تندروی، مهار جرایم سازمان‌یافته، تحکیم همکاری‌های سرحدی، گسترش دادوستد فرهنگی و آموزش کادرهای مسلکی افغانستان صحبت‌های مفصل داشتند. آقای اتمر با تأکید بر پیوندهای عمیق تاریخی و فرهنگی میان دو کشور، خواهان گسترش روابط دوجانبه به سطح همکاری‌های استراتیژیک شد.

در این حال، حنیف اتمر با صدراعظم تاجیکستان نیز دیدار کرد.

دو طرف در مورد تحقق صلح پایدار در افغانستان، گسترش همکاری‌های اقتصادی، تقویت جایگاه افغانستان در همکاری‌های منطقه‌یی، و تحکیم روابط فرهنگی میان دو کشور صحبت و تبادل نظر کردند.

در این نشست توافق شد تا نهادهای سکتوری دو کشور برای طرح و اجرای پروژه‌های عملی در عرصه‌های اقتصاد، انرژی، تجارت و ترانزیت، نشست‌های مشترک را برگزار نموده در این راستا باهم یکجا کار کنند. همچنان تأکید شد تا پروژه‌های تولید، ترانزیت و انتقال برق که در اتصال منطقه‌یی و تقویت جایگاه افغانستان در منطقه نقش اساسی دارند، در اولویت‌های همکاری‌های دوجانبه میان دو دولت قرار گیرند.

با اشاره به مشترکات فرهنگی دو کشور، صدراعظم تاجیکستان بر تحکیم روابط علمی و فرهنگی تأکید کرد و افزود که با وجود امکانات محدود، دولت تاجیکستان در فراهم‌آوری بورسیه‌های تحصیلی برای دانشجویان افغان همکاری خواهد کرد.

در پایان، سرپرست وزارت امور خارجه از دولت و ملت تاجیکستان برای همکاری‌های همیشگی ‌شان در عرصه‌های گوناگون سپاسگزاری کرد. آقای اتمر پشتیبانی تاجیکستان را از موقف جمهوری اسلامی افغانستان در تأمین صلح پایدار ستود و بر تقویت همکاری‌های استراتیژیک در بخش‌های امنیتی، سیاسی و اقتصادی تأکید کرد.

دیدگاهتان را بنویسید

نشانی ایمیل شما منتشر نخواهد شد.