• انتشار: ۲۵ اسد ۱۳۹۵
  • ساعت: ۱۲:۱۲
  • سرویس: اقتصاد
  • کدخبر: 12320
پرینت

میز گرد فرصت های تجاری افغانستان و تاجیکستان در شهر دوشنبه برگزار می شود

مقامات تجاری تاجیکستان و افغانستان با همکاری یکدیگر قرار است فردا سه شنبه در شهر دوشنبه پایتخت تاجیکستان میزگردی را تحت عنوان گتفگو برای فرصت های تجاری میان دو کشور برگزار کنند.

دفتر مطبوعاتی اتاق تجارت تاجیکستان در خبرنامه ای نوشت؛ “این رویداد برای گسترش و حمایت فرصت های تجاری میان افغانستان و تاجیکستان برگزار می شود.”

گفته می شود در این میز گرد، کارآفرینان و تاجران کشور تاجیکستانی اطلاعاتی در خصوص فرصت های تجاری در افغانستان دریافت کنند.

اتشه تجاری سفارت افغانستان در تاجیکستان قرار است این اطلاعات را در اختیار این تاجران و کارآفرینان تاجیک قرار دهد.

خبرنامه اتاق تجارت تاجیکستان همچنین می افزاید؛ در این میز گرد تاجران افغان که در تاجیکستان نیز حضور دارند، در خصوص فرصت های تجاری موجود در تاجیکستان اطلاعات بدست می آورند و همچنین تجربیات شان را در این زمینه با دیگر حاضران شریک می سازند.

براساس آمار ارائه شده توسط یک نهاد وابسته به ریاست جمهوری تاجیکستان، حجم مبادلات تجاری میان افغانستان و تاجیکستان در شش ماهه اول سال میلادی جاری نسبت به سال قبل (۲۰۱۵) ۴۳٫۵ فیصد کاهش داشته است.

در شش ماهه اول سال میلادی جاری حجم مبادلات تجاری میان دو کشور، تقریبا چیزی بیش از ۳۱ میلیون دالر بوده است.

گفته می شود این کاهش حجم مبادلات تجاری میان دو کشور در سال جاری، ناشی از ناامنی های اخیر در مرزهای شمالی کشور بوده است.

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *