• انتشار: ۶ حوت ۱۳۹۷
  • ساعت: ۱۲:۱۱
  • سرویس: سیاست
  • کدخبر: 32659
پرینت

تاجیکستان از برقراری صلح در افغانستان حمایت می‌کند

امام علی رحمان، رئیس جمهور تاجیکستان، حمایت این کشور از پروسه صلح افغانستان را اعلام کرد.

رئیس جمهور تاجیکستان که در مراسم ۲۶‌مین سالگرد تاسیس نیروهای مسلح این کشور در دوشنبه سخن می‌گفت، افزود کشورش از رسیدن افغانستان به یک صلح دایمی حمایت می کند، زیرا افغانستان یک همسایه نزدیک با تاجیکستان است.   

رهبر تاجیکستان ابراز داشت برای تامین ثبات در افغانستان و جلوگیری از فعالیت های هراس افگنی در این کشور به همکاری نزدیک منطقه‌ای نیاز می‌باشد.

 رئیس جمهوری تاجیکستان خاطر نشان کرد هر اقدامی که منتج به تامین امنیت در افغانستان شود برای امنیت تاجیکستان هم خیلی مهم است.

اعلام حمایت تاجیکستان از صلح افغانستان در حالی مطرح می‌شود که دور پنجم مذاکرات مستقیم امریکا با طالبان این بار با حضور ملاغنی برادر، فرد شماره دوم طالبان، امروز در دوحه قطر صورت می‌گیرد.

امریکا و طالبان پیش از  این چهار دیدار مستقیم با یکدیگر را برگزار کرده‌اند.

از طرفی هم، چندی پیش گفت‌وگوی مسکو با حضور برخی شخصیت‌های برجسته سیاسی افغانستان و نمایندگان طالبان در پایتخت روسیه برگزار شد.

این درحالی‌ست که روسیه نیز سال گذشته نشست  مسکو را در مورد صلح افغانستان برگزار کرده بود.

به باور کارشناسان امر، اجماع جهانی در مورد صلح افغانستان اکنون شکل گرفته اما هماهنگی بین تلاش‌هایی که در منطقه در مورد صلح افغانستان صورت می گیرد نیازمند کار مضاعف می‌باشد.

پاسخی بگذارید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *